Инаркъе хилар Малсаганаькъан Розай кхоллама сайре
18.02.2025 14:03
Инаркъерча культуран ЦӏагӀа кхоллама сайре дӀайихьар халкъа артистка йолча Малсаганаькъан Розас, из вӀашагӀъеллар «Дешархошта культура» яхача проектах. «Иллешца аз хестаю хьо Даьхе» яха кхетаче дӀахьош, дукха нах гулбеннабар, яхаш, дийцар МагӀалбика кхален мэре «Сердало» газетага.
Цига дакъа лоацаш бар беза хьаьший, халкъа артист Эсамарзанаькъан Ӏалаудин, Охценаькъан Роза, иштта гӀалгӀай метта, литературан хьехархой, дика бовзаш бола йоазонхой. Цар самукъадаьлар цу дика вӀашагӀъеллача кхетачене, цига яр «Лоаман оаз» яха вокальни тоаба, иштта къона иллиалархо Долакханаькъан Зульфия.
СДК художественни кулгалхочо Котанаькъан Вахас даькъалайийцар Малсаганаькъан Роза, цо белгалдир ГӏалгӀай республикан культурни тӀехьале лораяр лоархӀаме долга.
