Насос оттаяь, хин гӀулакх тоадир ГӀажарий-Юрта
11.06.2024 09:47
![](http://serdalo.ru/storage/ScspcKnJXCVOSeuSnuqyzsHRDr5mT5WKmaL1fRhg.jpg)
ДикагӀа лоархӀаш йола йоккха насос оттаяь, хин хьал тоадеш баьхкар ГӀажарий-Юрта. Из хоам «Сердалога» бир ГУП «ЦаӀ вола хин гӀулакха оператор» яхача оагӀоно.
«ДӀабихьача балхо хий дикагӀа хьадайт тахан. Юртарча бахархошта доккха совгӀат хиннад цу гӀулакхах, хӀана аьлча, ахкан хана хий массайолча моттигашка дӀа ца кхоачаш, хало ловра цар», - йоах тхогарча хоамо.
Белгалде деза, хин хьал тоадара тӀехьа боккха болх дӀахьош латтилга. Тишъенна турбаш дӀайоахаш, кердаяраш чуйоахкаш, тоае еза моттиг тоаеш, керда, дикагӀдола гӀирсаш увттадеш, из хьал аттачахьа даккха гӀерт вай мехка.