«Из гӀишло хьалъеш я «Юрташ дегӀаахар» яха паччахьалкхен программа кхоачашъеш, республикан юртбоахама Министерствонна чуйоагӀаш. ГӀалгӀай Республикан гӀишлон Министерство я цига къахьегар, деррига гӀишлон балхаш деш яр я «ЕВРОСТРОЙСЕРВИС-2010» яха подрядни фирма. Контракт чӀоагӀъяьяр тушола бетта; гӀишлонхоша, кхы ха ца йоаеш, лаьттанцара балхаш дӀадоладир. ХӀанз уж даь даьннад 50%. ГӀишлон майдан тӀа болх беш я 5 техника.

Лаьтта чӀоагӀдеш, хьалхара оаса Ӏобуллаш ба», - аьлар хоамо.

Хьалъеш йола гӀишло лаьрхӀа я 1,5 шергара 7 шу даллалца дола бераш, кхетам луш, кхедара. Цига материально-технически гӀирсашца Ӏалашо яьй, иштта кхетам балара болх лерттӀа дӀабахьара йола моттиг а дика кийчъяьй.

Берашта а цар хьехамчашта а эшаш мел дола хьалаш вӀашагӀдехкад.

Иштта зӀамагӀа долча берашта лаьрхӀа а моттигаш кийчъяьй. ГӀишло хьалъяра мах ба 176 млн сом, карарча шера хьа хьожадаьд 100 млн.

ЛоархӀаме да цу юрта кхы а хоза ишкола хьалъеш хилар, 320 моттиг йолаш. 2023 шера цу юрта хьалъяьй керда ФАП.