Южне хьалъеш латт, 120 моттиг йола берий беш
20.06.2024 09:27
Южнера зӀамига хьаьший тӀаэцаш, ший наӀараш хьаелларгья кастта кердача берий бешо. Из хоам «Сердалога» бир МагӀалбикерча администраце.
«ГӀишлон балхаш ду «ЕВРОСТРОЙСЕРВИС-2010» яха моттиг я из болх дӀатӀаийцар. БӀаьстан хьалхарча бетта дӀаболабаьб из. Шозза вӀаштӀара яь берий беш мел эшар чудолаш хургья. Таханарча берашта мел эшаш бола кхоачам Ӏалашбаь йолча цох доккха совгӀат хургда бахархошта», - йоах хоамо.
1,5 шергара 7 шерга кхаччалца долча берашта лаьрхӀа я из. 167 млн рузкъа да цу гӀулакха хьакъоастадаьр.
Юрташкара вахара хьал тоадара тӀехьа йолча программага гӀолла кхоачашбеш, беркате болх ба из. ГӀишлон балхах йола Министерство я цу балха хьалхалаттар.
