ГӀалаш йолча моттигашка къахьегама шоатта дӀадихьад
ЖӀайрахьерча паччахьалкхен исторен, архитектуран музея болхлоша Аьга-Кхале къахьегама шоатта дӀадихьар. Ӏаламах дог лазаш арабаьннарашка хьежаш лаьттар дукха болх бар. Лоаман моттигашка салаӀа ухача бахархоша, хьаьшаша шоашта тӀехьа дукха нувхаш ют.
«ЧӀоагӀа дехар ду лоаман моттигашка ха яккха ухача нахага, боккъал шоашта тӀехьа Ӏалама зе деш бола, Дала хьеннача цу хозача арений куц толхадеш бола кегар ма бита! Массахана из хьал лорадеш лела дезаш хул тха. Дукха ха яц Аьга-хин юхера доазув цӀендеш, Фуртоуг яхача юрта, хӀама бе доацараша вӀашагӀъелла гӀишло оаха дӀаяьккха», - дийцар «Сердалога» музейна кулгал деча Сампенаькъан Ахьмадхана.
Вай массане кхетаде деза, мехкара тамашийна хоза Ӏалам вайна Дала денна совгӀат долга. МоллагӀа долча хӀаман бос бов, боаггӀача боараме доал деш ца хилча. Вай дай лийнна моттигаш кхувш латтарий, царна тӀехьа боагӀаргбарий кхоане, вай къаман истори да, цудухьа дехар ду нахага, сомабаккха шоай сакхетам, лорабе мохк, ший дегӀаца эздел долча сага шийна тӀехьа кегар бутаргбац!
