ГӀалгӀайчен столице «Ишкол 21» яхача моттига йийллача наӀарий Ди хургда
ГӀалгӀайчен промышленноста, таьрахьий дегӀаахара Министерстве хьалхадаьккхар, тов бетта 4-ча дийнахьа, Магасе «Ишкол 21» оала йийллача наӀарий Ди дӀахьош хилар. Из дика дешара проект кхоачашъер Сбер я, мецената Гуцаранаькъан Микаила хьал а лоацаш, таьрахьий дегӀаахара Академе даькъ тӀа.
«Цига дакъа лоацаш хургболча наьха таро я Магасе, «Ишкол 21» даькъ тӀа экскурси е, пайда луш йолча лекцешка ладувгӀа. Хьаьший таро хургья «ДӀаволалуш вола программист», «Шо хьаийцад» яхача, бизнес-дӀаяхьара кеп оттаеш долча ловзарашка шийна фу хов хьажа, цо Ӏомавергва Ӏилманхошца къамаьл дарга нийса кийчо е, шийна безаш бола болх караберзабе. Хьаьшашта Магасерча «Ишкол 21» даькъ тӀа гойтаргда сихха ду хьехамаш. ӀТ-индустре даькъ тӀара кердадараш довзийтаргда, шоай болх дӀахо вӀашагӀболларах дола хьехамаш дергда царна», - аьлар «Сердало» газетага мехка Минпромсвязе.
«Ишкол 21» яхача моттиге деша отта безам барий таро я из кхетаче дӀахьоча дийнахьа а шоай дехараш дӀадала, цига дӀаязбала. Карарча шера тӀеххьара дӀахьош долча дешара тӀакхе йиш йолаш ва моллагӀа безам бар, тов бетта 16-ча денга кхаччалца, из дешар хургда цул тӀехьагӀа 26 дийнахьа.
Къонача, хьинар долча наха цу тайпарча аьттонах пайда ийцача бакъахьа бар, хӀана аьлча цу тайпара говзанчаш тахан массанахьа чӀоагӀа эшаш ба.
