Культуран оагIонцара керда гIишло 50%-га кхоачаш кийча я
Магаса 17-ча кхале хьалъеш латт тахан Паччахьалкхен филармонена хетаяь гIишло. Из хоам «Сердалога» бир гIишлошъяра министерствон зарбан болх лелабераша. 2023-ча шера ардара бетта дIаболабаь болх ба из ООО «СТРОЙМОНОЛИТ» яхача гIишлон балхаш деча моттиго. Оттаяьча ханага хьежжа дIадодаш да деррига. Нийсса ах болх баь баьннаб таханарча дийнахьа.
«Лакхерча гIата пенаш, юкъера йовкъаш йотташ боахк болхлой, иштта йIовхалцара, токацара балхаш да дIадоладеш. Ер шу йистедоалаш кийча хила езаш я филармоне гIишло», - йоах тхогарча хоамо.
Кхоллама оагIонцарча болхлошта доккха совгIат хургда цу моттигах. 1,8 млрд сом рузкъа дIатIадахийта йолча цу моттиге болх дIахьош, царна мел эшар долаш хургда. Бахархой, мехка кхаьча хьаьший гуллуш моттиг хургья цох кастта.
