Лаьца боахка нах проекташ увттае Ӏомабир Шолже
Лийца боахкача наха хӀама Ӏомадеш хилар кагирхой политикахи, туризмахи йолча министерствон болхлой. Из хоам «Сердалога» бир цигарча зарбан болх лелабеча ГӀулой Аминас.
«Лийца боахкараш пайдане хургдолча гӀулакха тӀаозар духьа, проекташ оттаяра говзал Ӏомаеш йола кхетаче дӀайихьар министерствос. Ведажанаькъан Зоврбика дийцар, проект оттаеча хана, цхьацца хӀама доладеча кагирхоша теркал ца деш дуташ долча доккхийча гӀалатех. Цо хьалхадаьхар, моллагӀа хӀама хьакхоллача хана, эггара хьалхарча аргӀагӀа тоаде дезараш», - дийцар тха газетага.
Колоне бахараша техкар цу балхацара керттердараш. Цар оттадаьча балхашта юкъе дар колоне ков тоадар, дегӀа пайда болаш ха дӀаяхьа аьттув луш дараш юкъедоаладар, республикерча таро эшаеннача наха новкъостал лоаттадар, иштта кхыдараш а.
