Шолже, Илдарха-Гӏалий тӏа доал доацача цискашта цӏалгаш оттадир
Шолжа шахьарерча, Илдарха-Гӏалий тӏарча моттигашка доал доацаш лелача цискашта лаьрхӏа цӏалгаш оттадир. Шолжерча доал дарахи кердача технологехи йолча колледжо дӏахьош дола беркате гӏулакх хьаллаьцар мехкарча стоматологически институто. Из хоам «Сердалога» бир цу моттигера.
«Даьла раьза хургвола из хоза гӏулакх хьаллаца арабаьлар СКУиНТ кулгалхочун гӏонча йола Мажирганаькъан Зухра, Гӏалгӏай стоматологически институте проректора гӏонча йола Коазой Фира. Даьла духьа гӏо дарах болча «Безликие» яхача оагӏонга гӏолла ӏалашдаь, цискашта лаьрхӏа 10 цӏалг оттадир цар цига. Дукха цискаш шоаш болча чуийца леладеча бахархошта совгӏата делар ши цӏалг», - йоах тхогарча хоамо.
«Из болам духхьал цискашта терко яр хинна ӏац, цу беркатеча гӏулакхага гӏолла кхувш латтарашта хьалхадаккха гӏерт тхо, гӏо де кийча волаш, къахетаме, дикал йоаржаеш хилар сага дегӏаца эггара лоархӏаме йола, цун юхь сийрдайоаккха оамалаш йолга», - аьлар Мажирганаькъан Зухрас.
