Шолжа-Шахьара Выгонни урам тӀа гӀашлой никъ буллаш латт
19.06.2025 11:02
Шолжа-Шахьарерча Выгонни оалача ураме 400 метрага кхоачаш гӀашлой никъ буллаш боахк. Вай мехкадас Келаматанаькъан Махьмуд-Ӏаьлас тӀабилла дӀахьош ба из болх, хӀана аьлча из никъ дукхача лоархӀамеча моттигашта тӀабодаш ба, цу юкъе я № 10 шахьарера ишкол а.
«Сердалога» из хоам бир мэре. Карарча хана кӀалхара кӀийле асфальт Ӏобилла кийчъеш боахк цига. Шахьара дас Ӏумаранаькъан Аслана, цун гӀонча волча Беканаькъан Халида тӀахьожам беш дӀахьош ба болх.
ХьатӀабоагӀа бутт бовш, чакхбала мегаш ба из. Белгалде деза, 2024-ча шера цу урам тӀа 650 метр асфальт Ӏобуллаш болх чакхбаьккхалга.
