Шолже дийцар, шахьар тоаеш лораде дезарех лаьца
Шолжерча Ӏаьдала комиссе кхетаче хилар, цига дийцар тоадара бокъонаш телхаерашта духьале ярах. Из хоам бир цигарча зарбан болх лелабераша.
Комиссе кулгалхочо Мержой Лемас кулгал а деш, дӀахьош хиннача кхетачене дийцар ца доагӀача хӀама нахалдоаккха каьхаташ хьалдеттарах, дагадоацача моттиге нувхаш хьаӀоаярах, шоашкара деш долча лаьттанцарча балхех, йокъаеннача нувхех цӀераш еттарах.
«Бокъонаш телхаерех цхьабараш цу кхетаче дакъа лоацаш бар, цудухьа цар а таро хилар шоашта хетар ала, шоай оагӀорахьара нийсденнача кхоачамбоацарех.
Бокъонаш телхаерашта гӀод техар Шолжа-Шахьаре оттаяьча бокъонаша дӀадеххача беса. Цу тайпара бокъонаш чӀоагӀъяьй шахьара депутатий Кхело №17/2-3 14.08.2024 шера.
Деррига а такха деза гӀод да 23 протоколо оттадаь 239 эзар сом», - аьлар Шолжа администраце, цу юкъе белгалдаьккхар хӀара вахархочун декхар да шахьаре лостам, цӀено лоаттаяр.
