Выгонни оалача урам тӀа рейд дӀайихьар Шолжа-Шахьаре
27.05.2025 12:41
ХӀама йохкача доазон юхе уллача Выгонни оалача урама хьал тахка арабаьлар Шолжа-Шахьарерча администраце болхлой. Из хоам «Сердалога» бир цу моттигера.
«ХӀама йохкаш мел йола моттигаш йоал дӀачутелача моттиге дӀачӀоагӀъенна йий тохкаш, болх дӀабихьар шахьаре, иштта цӀерцарча кхерамзлен хьал цу моттигашка малагӀча боараме латт хьажа, аьнна, тӀадиллар цу гӀулакха бехктокхаме барашта», - йоах хоамо.
Лаьттанца дувзаденнарех болча болхлошта тӀалаттар, цу оагӀонцара гӀулакхаш Ӏаьдала бокъонаша дӀадеххача тайпара дий хьежар, хӀаьта архитектуран, ЖКХ оагӀон болх теркалберашта тӀадиллар деррига а боаггӀача боараме лорадеш дий тахкар. Теркалдаь кхоачамбоацараш, дӀахо бизнесменашца болх дӀабахьар духьа, дӀаяздир рейд еш хиннараша.
