Шолжа-Шахьарерча керттерча хин бердаш цӀендеш, шердеш; болх дӀахьош латт
29.03.2024 11:55
Хиш долалуш йола ха хьаоттарца, Шолжа гонахьара йистош цӀенъеш, бердаш шердеш бола боккха болх дӀабахьа арабаьннаб МЧС болхлой. Из хоам «Сердалога» бир Шолжа-Шахьарерча администраце.
«Из болх дӀабахьара гӀулакх малагӀча боараме латт хьожаш ба шахьара да вола Ӏумаранаькъан Аслан, цун гӀонча Сейнарой Бахьаудин, ГО, ЧС оагӀонна кулгал деш вола Балайнаькъан Аслан», - йоах тхогарча хоамо.
Хий боаггӀача боараме Ӏо ца дохийташ, цунна новкъарле еш йола нувхаш, кагьенна Ӏолийга гаьнаш, хиво Ӏокхихьа кхыйола бӀеха хӀамаш дӀайоахаш, болх ба цига дӀахьор.
БӀаьстан догӀаша хий дикка айду, цунга хьежжа из тайпара болх ханнахьа дӀабахьар чӀоагӀа лоархӀаме да. 1210 м. кхоачаш моттиг я болх чакхбаккха безар. ТӀаьшта кӀалхара пхи моттиг я дикка цӀенъе езаш.
