Шолжерча тохкамхоша гучаяьккхар, ахча лочкъадаь моттиг
ГӏалгӀайчен Шолже техка даьлар, коммерчески организаце ахча лочкъадаь хинна гӀулакх, яхаш, дийцар «Сердало» газетага ГӏалгӀай Республике гӀолла йолча Россе СК Тохкама урхаллене. Дувцаш дар да, цу тIара йоал яла езаш дола доккха ахча.
ГӏалгӀай Республике гӀолла йолча РФ Тохкама комитета Шолжа кхален тохкама урхаллен болхлочо чакхдаьккхар акционерий цхьанкхетара генеральни директора духьалара уголовни гӀулакх. Из бехке ву даьча зуламан, РФ УК (цу тӀа гӀолла йоал яла езаш дола доккха ахча къайладаккхарах) д. 2, 199.2 ст.», - хоам бу газетага.
Тохкамхоша яхачох, 2022 шера аьтинга бетта денз 2025 шера оагӀой беттага кхаччалца бехке веш вар хиннав акционерий цхьанкхетара керттера директор, из тӏахьожаш хиннав цу боахама, иштта предприяте ахчан-боахама даькъа.
2025 шера цунна ховш хиннад ший организаци йоалах дола ахча хьадаланза йолга, иштта ГӏалгӀай Республике гӀолла №2 йолча Федеральни йоала служба кхален юкъерча инспекце низагӀа из хьадаккха йиш йолга, из дӀадала таро а хиннай цун, хIаьта цо из кхычахьа дӀадахийтад.
Цу тайпара хьал нийсдаларах, йоала хьа ца луш дитар 80 миллион сом.
Уголовни гӀулакх дӀадахьийтад суде тахка.
