ГӀалгӀайчен Шолже, паччахьалкхен 100 шу дизарга, хьаеш латт салоӀа моттиг
28.05.2024 16:31
ГӀалгӀайчен Шолже, шоаш лаьрхӀа хиннача беса, дика болх беш, хьалъеш латт паччахьалкхен 100-шу дузаш хилара хетаяь, салоӀаш йола зӀамига моттиг, яхаш, дийцар «Сердало» газетага мехка министрий кабинете.
Из проект кхоачашъеш я «Шахьара дика хьалаш» яхача, вайна дика йовзаш йолча къаман проекта чуйоагӀаш.
Цу моттиге хӀанз, чӀоагӀале е лаьрхӀача пена, лард дӀаеллай, плитка тохара дола доазув а кийчдаьд», - йоах хоамо.
Хоза кийчдаьча цу даькъ тӀа сердал а хургья, велосипедаш хехка никъ а буллургба, гӀандаш Ӏооттадергда, цу юхе нувхаш чукхувса аьшка яьшкаш а оттаергья. Лоацца аьлча, из моттиг хоза а наьха безам тӀабодаш а хургйолаш, шоашта могар деш ба болхлой. Беррига болх йистебаргба аьхки, аьтинга бетта.
