2025-ча шера Ӏан хьалхарча бетта 8-9-ча деношка 40 эзар сом ахча доаккха гӀоз ба бохкаш, аьнна, хоам оттабаьб интернета оагӀонашка цхьан кхалсага. Цу бетта 10-ча дийнахьа хоамах енача цхьанне, из гӀоз эца безам ба ший, аьннад.

Цу дийнахьа цхьан маӀача сагаца хьаена, гӀоз дӀабихьаб цо, 25 эзар сом бутт бовш, юхедиса 15 эзар сом саькура бетта хьалхарча деношка хьалургда ше, аьнна; бакъда, кхы хоаме ца йоалаш, яйна дӀаяьннай гӀоз каракхаьчар.

Полице болхлоша сиха хьалехар зуламхо, Ӏочуйоалаяьча цо дари дир ше даьчун. Цунна духьала гӀулакх хьадийлла, дӀахо тохкам беш да Ӏаьдал.