СВО доакъашхоша дехар даь, баскетбола къоастадаь доазув тоадир Шолжа-Шахьаре
СВО доакъашхой дехар теркалдаь, Шолжа - Шахьарера баскетбола къоасадаь доазув меттадоаладеш болх дӀабихьар мехка. Из хоам «Сердалога» бир «Даьхен лорбой» яхача ганза моттигерча филиало.
«Украинерча тӀема операце бӀухоша дийхар, баскетболах ловзаш йолча моттига хьал меттаоттаде шоашта, аьнна. Цига хьажа бахача ганза болхлоша шахьара даьна, Ӏумаранаькъан Аслана тӀадихьар из дош. Сиха оарцагӀбаьнна, «тускараш» оттадаь, лампаш ехка, басарашца къоастам беш боаггӀача боараме меттадоаладир из доазув. Ара боад эттача а, ловза йиш йолаш сийрда я цига хӀанз», - дийцар тха газетага.
«СВО доакъашхой вахарера гӀулакхаш хьаллоацаш; спорта, культуран юкъе хилар лоархӀаме да тахан. Вай керттерча декхарех да тӀема халонех чакхбаьннарий вахара денош дизар; сийрда, паргӀата хилийтар. «Даьхен лорбой» яхача ганза тахан цу оагӀонца дӀахьор боккха болх ба», - дийцар ганза моттигерча филиала хьалха латтача Оздой Муслима.
