Доккхача ахчанцара тийшаболх гучабаьккхар Шолжа-Шахьаре
Коммерчески моттига кулгал деш хиннача сага духьала гӀулакх хьадийллар РФ моттигерча Тохкама комитета Тохкама оагӀон болхлоша. РФ УК 4-ча даькъа 159-ча статьях бехктокхаме озаш ва из саг Ӏаьдала болхлоша (доккхача ахчанца тийшаболх кхостабар).
Тохкама болхлоша белгалдечох, 2019-ча шера маьтсела бетта Ӏалама гӀулакхех, экологех йолча Министерствон, коммерчески фирман юкъе паччахьалкхен контракт чӀоагӀъяьй, Эбарга-Юртарча Советски оалача ураме Шолжа берда йистош, хий хьалу гӀирсаш дикка чӀоагӀдеш, боккха болх дӀахьоргболаш.
Контракта мах 13 миллион сома тӀехьа боалаш хиннаб. Из хоам «Сердалога» бир цу оагӀонцарча министерствос. Контракт кхоачашъеш цу моттига кулгалхочо баьча балха мах геттара дукха оттабаьб – 13 000 000. Харцача наькъаца, дукха зе деш, ахча лочкъадаьрг ва из хӀанз.
Карарча хана из гӀулакх ма дарра тохкаш, экспертизаш йоахаш ба Ӏаьдала болхлой. Деррига а ма дарра гучадоаккхаргдолаш, тохкаш латт цигара хӀама. Россе моттигерча УФСБ кхаьчача каьхатех хьадийллад цу сага духьалара гӀулакх.
