Шолже хьалъеш латт, доал доацаш лелача дийнаташта чуӀе моттиг
Шолжа-Шахьаре хьалхара хьалде дӀадоладаьд, доал доацаш лелача дийнаташта лаьрхӀа «Китмир» яха цӀа. Из лоархӀаме проект, тӀехьахьажа саг воацаш долча хьайбашта тхов-кӀийле яр кхоачашдеш я. Шолжа шахьара депутатий кхело, Администраце хьаллоацаш, из хоам бир «Сердало» газетага доал деча даькъ тӀа.
Шахьара Кхела депутатий кулгалхо Оздой Ингисхан, проекта тӀахьожаш волча, шахьара депутатий кхела кулгалхочун гӀончаца Келаматанаькъан Адамца, ваха хилар цу моттиге, дӀахьош болча балхага хьажа. «Китмир» яха тхов-кӀийле хьалъергья 2 гектар лаьттан тӀа. Карарча хана проекта каьхаташ кийчдаьд, цу доазон тӀа дӀахьош ба юххьанцара Ӏалашо яра болх. Проекта чудоагӀаш да дика хьалаш хьакхоллар, цига леладергда 120 циск, 60 жӀали. Иштта хургья цига, лаьрххӀа хьайбашта уж паргӀата лелара хьаяь моттигаш, царна даха моттиг, иштта таро хургья дарба де, маьхий тоха.
Котокафе хиларах уж го а, царга хьажа а таро хургья. Из дика майда хургья берашца къамаьл дара, хьайбашца мишта хила веза гойташ, вай кхувш йоагӀача тӀехьенна бехктокхаме хилара никъ гойташ.
«Китмир» духхьал хьайбай фусам хинна Ӏергъяц, из хургья хьайбашцара юкъарло, царца дика хилара дола масал эца моттиг.
