Европан чемпионате котало яьккхача дзюдоиста, духьалбахар мехкахой
Македоне дӀайихьача Европан яхьашка котало яьккха, цӀавоагӀаш волча дзюдоиста Хамхой Ӏадрахьмана духьалбахар Шолжа-Шахьаре. Из хоам «Сердалога» бир «Чемпион» яхача ФОКа болхлоша.
«Чемпион цӀакхачар чӀоагӀа лоархӀаме дар Яндарерча ФОКа кулгал деча ЧӀасанаькъан Илеза, Наьсарен кхален администрацена, физически культурахи спортахи йолча Министерствон хьалха латтача Белхарой Руслана. Балхара салоӀаш цӀагӀа воллашехь, «Магас» аэропорте спортсмена духьалвахар министр», - дийцар тха газетага.
18 шерга кхачанза болча дзюдоисташта юкъе дӀайихьача яхьашка дикка белгалваьлар вай мехкахо, минспорта боккха толам ба из. Гулбеннараша белгалдир, из цу турнирага кийчо еш дукха къахьегаш хиннилга.
«Къонача спортсмений дог ураоттадергда цу толамо. Лакхерча моттигага кхача ловрашта дика масал да из», - аьлар ЧӀасанаькъан Илеза.
