Шолжерча хьун боахаме 250 кийла нажа, попа ги дӀадийра
Шолжерча хьун боахама болхлоша, ГӏалгӀай Республикан Ӏалама Министерствон хьунашкара цӀераш йоаяра центра болхлоша дӏадийнад 250 кг нажа, попа ги, яхаш, хоам бу «Сердало» газетага Ӏалам лорадеча боахамо. Хургйолча гаьнаша дӀалаьцар 0,35 гектар, сатувс укхаза 10 эзар га хьахиларга.
Из таро хилар, даим дӀадувш дола фу лорадеш леладарах, цун ший ханнахьа доал деш, хий тохаш, лаьтта кӀаьддеш, оасар деш, зулам деш йола са доалла хӀамаш дӀайоахаш хиларах.
«Тха керттера декхар да - хургйолча дикача хьун гаьнаш хьалкхеяр. Массехк шера, царга хьожаш, доал дергда», - аьлар Шолжерча хьун цӀераш йоаяра кулгалхочо Йовлой Мусас.
Цу тайпара хьахинна зӀамига гаьнаш лелаю хьу меттаоттаяра. Белгалду, из да, 2025 шера хьун болхлоша шоаш хьагулдаь, «Рослесозащита» ФБУ Филиало дикала белгало енна фу.
Из беррига болх дӀахьош ба, РФ Президента Путин Владимира могаяьча, «Лорае хьунаш» яхача федеральни проекта, «Экологически таро» яхача къаман проекта чубоагӀаш.
Шераш дӀагӀоргда; кердача, йоккхийча, нийсача гаьнаша хозъергья ГӏалгӀайче, шоай хозалца нах гӀадбугаш, дукхача садоаллача хӀамашта хьамсара фусамаш хулаш.
