Хи чу ваха хиннача сага гӀо дир Шолжа кхален лораша
ДӀадахача салоӀача деношка Алхасте, Эса чу лувчаш баьхкарашта юкъера цаӀ, дегӀ мелденна, хьийдда доагӀача хин низа духьала ца отталуш висар. Цун тӀехьа чутовсабеннача гонахьарча наха хин кӀалха водаш лаьттар, араваьккха, Ӏовиллар. Цига хьатӀакхаьчача лорий сихача гӀон машина тӀарча тоабо цу тайпарча моттиге эггара хьалха де деза новкъостал дир цунна, меттавоалавеш.
УнахцӀенон гӀулакхех йолча министерствон зарбан болх лелабераша белгалдечох, лораш хьатӀакхаьчача хана, из саг геттара во хьал долаш хиннав. «Лор Ведажанаькъан Лайла, фельдшер Тоачанаькъан Мухтина, машин лоаллаш вола Иленаькъан Саламхан юкъе бола тоаба сиха хьакхаьча, из саг меттавоалаве эттар. Хьалхара гӀо даь, Шолжа кхелен керттерча дарбанче Ӏочувоалаваь, хьежар цунга. Карарча хана меттавена, ший цӀагӀа ва из», - дийцар «Сердалога» министерстве.
