«Юрто доаккхал ду саг» яха проект я Шолжа кхале дӀахьош
Цхьацца хӀаман тӀехьа белгалбаьнна бахархой теркаме лоацаш, «Юрто доаккхал ду саг» яха вахара проект я Шолжа кхале дӀахьош. Из хоам «Сердалога» бир хоамий оагӀонна кулгал деча ЦӀечой Беслана.
«Проекта автораша теркам бераш ба юртбоахама, унахцӀенон, дешара, культуран, спорта, иштта кхыболча оагӀонца къахьегаш белгалбаьннараш. Цар вахара никъ дикка техкачул тӀехьагӀа, ховш хургда, республикан вахар тоадара тӀехьа цар малагӀа дакъа лаьцад», - йоах тхога бенача хоамо.
ЦӀихезача наьха дезалий архиваш тохкаш, къаман вахаре накъабаьнна бахархой малагӀаш ба дӀагойташ болх дӀахьоргба проектага гӀолла.
ДӀахо, Шолжа кхален администраце сайта тӀа къаьстта моттиг хургья, цу тайпарча мугӀарера нах бовзийташ; хӀара бетта «Къахьегама байракх» яхача кхален газето а яздергда турпалхой вахара наькъах.
