Дукхача берий даь - заӀапхочун бокъонаш меттаоттайир
ГӀалгӀайчен сага бокъонех волча викала дукхача дезала даь, пенсе вахача заӀапхочун, Вахара ганзо шин бера луш дола ахча кӀезига даларах дола дехар кхоачашдир.
Из ГӀалгӀайчен сага бокъонех волча кертерча викала фусаме вера, Вахара ганзо, бокъонах доацаш, 50 % мара шин бера доагӀаш дола ахча хьа ца луш ше витара латкъа. Ше болх бе йиш йолаш вац, дукхача берий да ва, цхьаккха новкъостал доацаш а висав из.
Сага бокъонех волча викала, Вахара ганзага этта хьал нийсде, аьнна, каьхат дахьийтар. «Сердало» газетага хоам бир ГӀалгӀай Республикан УПЧ хоамий-аналитически центро, из каьхат техкачул тӀехьагӀа, берий а цар даь а бокъонаш меттаоттайир, яхаш.
«ЗӀамигача шин бера хӀара бетта доагӀаш дола дола 14 эзар 294 сом да, из хул 100%, цу тайпара ба республике оттабаь боарам», - аьлар тхога хоам баьчо.
