ГӏалгӀайчен шахьарашка овлангара кердадоахаргда итташ цӀенош, цӏенхашта тоадара наькъаца
Цахаддаш дӀахьош йолча вӏаштӏардаь цӀенош цӏенхаштта тоадара программо ший толамаш гойт, яхаш, дийцар «Сердало» газетага ГӏалгӀай Республикан Кулгалхочун зарбан болх лелабечо.
«Вай республике 11 шера 86 вӏаштӏардаь цӀенош цӏенхаштта тоадаьд. Из болх дӀахьош ба наьха вахара хьалаш тоаде дагахьа», - аьлар Келаматанаькъан Махьмуд-Ӏаьлас ший телеграм-канале.
Цо иштта хьалхадаьккхар, 2025 шера МагӀалбике, Наьсаре диъ цӀа тоадаь хилар. Инженерни гӏирсаш тоадаьд, йӀовхал лу моттигаш кердаяьхай. Уж деррига балхаш лаьрхӀача хана чакхдаьхар, цунца цхьана бахархой вахара хьалаш тоаделар, эзараш совгӀа болча наха из лоархӀаме дар.
Ювца программа хӀара шера кхоачашъеш я. 2026 шера цӏенхаштта тоадергда 21 вӀаштӏардаь цӀа, царех 14 Наьсаре да, 7 - МагӀалбике.
«Къаьстта ала безам ба, доалахоша шоаш дакъа лоацаш хиларах. Цӏенхашттача тоадара ганзе шоай ханнахьа ахча чулуш хиларо из программа тешшаме кхоачашъе таро лу.
Цхьана мара карагӏдаргдац кхерамзле йолаш, дика хьалаш хьакхолла»,-аьлар Мехкадас.
ГӏалгӀайче хӀара вӀаштӏардаь цӀа – из дукхача наьха зӀамига дуне да. Наха дика дакъа лоацаш хиларо, цӀеной доазонаш тоадаро, юкъардар лорадаро таро лу дукхача шерашка сатем бола, паргӀата вахар дӀадахьа.
