ГӏалгӀай мехка 2026 шера наджгоанцхой бетта, 213 йиӀиги 213 кӀаьнки даьд
ГӏалгӀай мехка бераш дара хьал во латтац. Масала, карарча шера наджгоанцхой бетта республике малхадаьлар бераш - 213 йиӀиг, 213 кӀаьнк. Из хоам бир «Сердало» газетага ГӀР Кулгалхочун зарбан болх лелабераша.
«Нана, бер хьаллацар - тха балха керттердар. ГӏалгӀайче бераш малхадалара хьал во латтац. 2025 шера чаккхенга диллача мехка 7 819 бер дир – из мехка гӀолла хьаийцача дикагӀа бола хьокхам ба. Бахархой хилар 540 025 сагага кхоачаш, тӀакхетар 1,1% хилар, – аьлар республикан кулгалхочо Келаматанаькъан Махьмуд-Ӏаьлас.
Керттера терко лоаттаю Ӏаьдало унахцӀено дегӀаахара хаттара – таханарча заман материально-технически кӀийле хьакхоллаш, хьалхале лелаю технологеш юкъейоахаш, лакха балха говзал йола нах кийчбеш. ГӏалгӀайче болх беш я «Нана, бер лорадара» программа, цун керттера маӀан да - лазар дий хьажар, таханарча тароний дарбаш дар. Дӏадахача шера 6 эзар совгӀа бер чакхдаьккхар. ЛоархӀаме дакъа цу балха юкъе дӀалоац Республикански бераш деча керттерча моттиго.
Мехкадас белгалдир, дӀахо из болх дӀахьоргба лорий урхалленаш кердайоахаш, болх тоабара программа дегӀайоалаеш, дикал йола лорий новкъостал нахага дӀакхоачаш хургдолаш. ЛаьрхӀар кхоачашдаро Ӏалашо ергья хургйолча тӀехьен дика могашал хилийтара, хӀара дезалера унахцӀенон хьал тоадара.
