350 метр дола керда хий чудуллаш латт Заьзгакъонгий-Юрта
12.08.2025 10:57
Заьзгакъонгий-Юртарча Ингушски оалача урам тӀа 350 метрага кхоачаш керда хий чудуллаш латт.
«Кхален совета депутат волча Ӏаьленаькъан Дауда къахьийгар цу оагӀонца. Цо дехар даь, керда хий чудилла эшаш дола ахча хьакъоастадир кхален кулгал деча Къоастой Ӏаддал-Хьамида. Дукха ца говш, хьаера юрта цу балха эшаш йола турбаш», - дийцар «Сердалога» МагӀалбика кхален администраце.
Къаьстта доккха баркал ала дезаш да юрта кулгал деча ЦӀечой Ювназа, кхоачам хьакхоаччаше болх дӀаболабарах.
Заьзгакъонгий-Юртарча бахархошта доккха совгӀат хулаш хӀама да, хица кхоачамбоацараш нийслуча ахкан хана, керда хий чудиллар.
