ЛоархӀаме дешаш дийцар, Аьккхий-Юрта нах вӀашагӀкхийттача
ГӀалгӀайчен МагӀалбика кхален Аьккхий-Юрта бахача наьха кхетаче хилар. Дувца оттадаь дешаш дар: цу юртара вахара-экономически хьал дегӀадоаладар, эскаре тӀахьехаш йола ха тӀакхоачаш хилар, контрактах эскаре ахар, иштта наркоманеца къовсам лоаттабар.
«Кхетаче дакъа лоацаш хилар дин викалаш, тӀема комиссариат, юртарча администраце кулгалхо БаймурзаевгIар Ӏаьла, МагӀалбика кхален администраце кулгалхочун гӀонча Хамхой Ӏалихан.
Юртахошта хьалхадаьккхар, бекарга бетта 1-ча дийнахьа денз, бӀаьстанара Россе эскаре тӀахьехаш йола ха дӀайолалуш хилар. Эскаре болхарий яьнна ха лакхъяь хиларца, хӀанз тIабехаш дола каьхаташ лургда, 18 шергара 30 шерга кхаччалца ха яьннарашта. ХьалхагӀа санна, эскаре тӀахьийхараш СВО хьожабергбац. ТӀема комиссариата викало юртхошта дийцар, Россе герзашцарча низий Министерствоца тӀем тӀа вахара хьакъехьара контракт мишта оттае еза, контрактникашта а цар дезалашта а йоагӀаш йолча бокъонех, луш долча ахчах, кхыдолча хьалех», - аьлар «Сердало» газетага МагӀалбика кхален администраце.
Аьккхий-Юрта бахархоша терконца тӀаийцар, наркоманеца дувзаденна къамаьл. Кхален администраце кулгалхочо Хамхой Ӏалихана дийцар кагирхошта, къаьстта уж наркоманена юкъебаргбоацаш, терко лоаттае езарах, хӀаьта юртхоша, шоай оагӀорахьа, из хьаллаьцар.
