Лоархӏаме гӏишло Гӏалгӏайчен Магӏалбике дика хьалъеш латт
Дӏахохьош ба Магӏалбик шахьаре 200 моттига лаьрхӏа Психоневрологически интернат хьалъеш бола болх, яхаш, дийцар Гӏалгӏай Республикан гӏишлон Министерстве «Сердало» газетага.
«Гӏишлонхой фирма «ГАРАНТ» ООО таханарча дийнахьа балхаш деш латт лардаш чуйоттара кийчон кӏоаг боаккхаш, из кийчбеш цу тӏа дӏахо балхаш дара»,-аьлар гӏишлон боахама хоамо. Иштта кастлуш говзанчаша, болхлоша дӏахо дӏахьоргда пенаш хьалдар, кӏалхара этаж чӏоагӏъяра дола балхаш. Цхьана дӏалаьрхӏача цу гӏишлон тӏа шовзткъа совгӏа саг ва болх беш, иштта пхиъ цига йоагӏаш йола техника. Хӏанз укх сахьате из болх баь баьннаб 11 %.
«Из социально лоархӏаме гӏишло вай мехка хьалъяра болх дӏаболабаьб юххьанца денз дика. Деррига балхаш дӏахьош да боарамца»,-аьлар гӏишлошъяра министра Иленаькъан Мусас.
Бартчӏоагӏама мах цу лорий моттига ба 1,5 млрд сом, цо цӏаькхаза а тешал ду йоккха терко лоаттаеш хилара тахан паччахьалкхено вахара, лорий гӏулакх дара даькъ тӏа вай республике.
Белгалду, кхоачашъеш я «Вахара гӏулакхаш леладара, иштта вахара хьалаш лоаттадара паччахьалкхен йоацача организацей даькъ тӏара болх кердабаккхар» яха федеральни программа хилар.
Хьатӏайоагӏача хана, кхозза вӏаштӏардаь цӏа хьалдузаргда эшаш мел болча технически гӏирсаца, дика дарбаш дергда, иштта вахара дика хьалаш наха лоаттадергда.
