СВО ветеран Ахкилганаькъан Адама къамаьл хилар, ший хьамсарча Магӏалбика дешархошца
Лаьрххӏача операце тӏема ветерана Ахкилганаькъан Адама къамаьл хилар, ший хьамсарча шахьара дешархошца. Къонача Магӏалбика бахархоша къаьсттача йӏовхалца тӏаийцар бӏухо, яхаш, дийцар «Сердало» газетага «Даьхен лорабой» ганза зарбан болх лелабераша.
Дийца къамаьл дар Даьхенцара безам совбаккхарах, тайп-тайпрача ханашка доккхий гӏулакхаш каргӏдаьннача наьха сий дарах, уж дагалоаттабарах, царгара масал эцарах. Магӏалбикерча №2 йолча ишкола дешархошта Ахкилганаькъан Адама дийцар лаьрххӏача операце даькъ тӏа ше мишта кхаьчар, шийна чов хиларах. Берашта из ишта а вовзаш вар гойтама роликах тӏара, хӏанз цар таро хилар из юхьдухьала го. Цу кхетаче хиннача военкомата, иштта кхыча моттигашкара викалаша берашта хьехамаш дир, ловца баьккхар цар дешара тӏехьа.
Юкъарча дешара моттига кулгалхочо яхачох, цу тайпара йола кхетаченаш дӏаяхьар эшаш да, кхувшбоагӏарий Даьхенцара безам совбаккхара, шоай граждански декхар кхоачашдара наькъ тӏа уж бахара.
