ГӀалгӀайчера СВО бӀухо Овшанаькъан Аласхан могашал меттаоттаеш ва Анапе
ЛаьрххӀача тӀема операце ветеран Овшанаькъан Аласхан, мина эккхарах чов хинна, Анапа-Шахьаре дарба деш ва, яхаш, дийцар «Сердало» газетага «Даьхен лорбой» ганза зарбан болх лелабераша.
«Мина эккхарах аьтта балама чов хинна вола Аласхан дӀахьожавир «Кристалл» яхача Анаперча санаторе, бӀухочун таро хургья цига ший могашал меттаоттаярал совгӀа, латтача халача хьалашка салоӀаш хила а», - йоах хоамо.
Белгалду, «Даьхен лорбой» ганз даим тайп-тайпарча санаторешца, дарбан центрашца бувзам лелабеш йолга, цига да бассейнаш, тренажерни залаш, физиотерапи.
Паччахьалкхен организаце кулгалхочо Оздой Муслима хетачох, могашал меттаоттаяра йола путевка ялар-из цхьаькха а боаккхаш бола гӀа ба, бӀухой таро хургйолаш, дарба дарца цхьана салаӀа а, шоай массаза дӀахьош долча вахаре могаш а болаш юхаберза.
