СВО ветеранаша даькъалабийцар ГӀалгӀайчен дешархой, керда дешара шу доладаларца
02.09.2024 21:55
Донбасс лораеш, Россе дӀахьош йолча лаьрххӀача тӀема операце доакъашхой беза хьаьший хилар Илдарха-ГӀалан №1 йолча ишколе, цар бераш даькъаладийцар дешара Денца. Хьаьший, бицлургбоацаш, дег чу бисар дешархошта.
«СВО ветеранаша берашта дийцар российски бӀухой деналах, тешамеча тӀема новкъостех, унзарча тӀема деноех. Цар иштта дийцар Даьхе езаш хила везарах», - аьлар «Сердало» газетага «Даьхен Лорбой» яхача ганза филиале.
Цу тайпарча кхетаченаша таро лу берашта дика кхетам бала. ГӀалгӀайчен йиӀигашта, кӀаьнкашта СВО доакъашхой ба денал дола турпалхой. Шоай даьй сий Ӏо ца дуллаш, турпалал гойташ, тахан тӀема мугӀарашка латтараш доаккхал деш тӀаэц тахан дерригача гӀалгӀай къамо.
