«Суртий дунен тӀа» яха викторина хилар, Шолжерча паччахьалкхен галерее
ГӏалгӀайчен паччахьалкхен гойтама зале «Суртий дунен тӀа» яха кхетаче дӀайихьар искусство езача къонабарашта. Хьаькъалерча яхьашка дакъа лаьцар Шолжерча №1 йолча юкъарча дешара ишкола дешархоша.
«Кхетаче хьайийллар галерея болхлочо Котанаькъан Салимас. Цо моаршал хаьтта тӀаийцар хьаьший, йовзийтар царна викторина бокъонаш, хоза ха дӀаяхьара кеп. Дешархой дика юкъебаьлар цига дакъа лаца. Бераша гойтар, хьалхара миноташ дӏайолаелча денз, шоаш раьза хилар, исбахьален искусствон даькъах шоаш дика кхеташ хилар, царна дагаухар суртий цӀераш, иштта дийцар тамашийнача хӀамаех, искусствон исторех лаьца», - аьлар «Сердало» газетага Паччахьалкхен галерея зарбан болх лелабераша.
Бераша цигара дика говзал ийцар, дийна къамаьл хилар шоай нийсархошца, доттагӏала тӏагӏолла бувзамаш хилар, кердадараш дайзар, иштта суртий дуненна мах байзар. Кхувш йоагӀача тӀехьено гойт шийна искусство езаш хилар, цудухьа из болх вӀашагӀбеллараш тешаш ба, цу тайпара кхетаче накъаяргья дешархой хозача хӏаманцара чам совбаккха.
