АЗС даьна 330 эзар сом гӀод техар
Илдарха-ГӀалий тӀарча прокурора баьча соцамах, машинашта доагор чудувттача моттига даьна 330 эзар сом гӀод техар. Бахьан - цӀерца дувзаденна кхерамзлен хьал боаггӀача боараме цахилар. Из хоам «Сердалога» бир Ӏаьдала болхлоша.
«ЦӀерцарча кхерамзлен хьалах йола бокъонаш лораеш воацаш, болх дӀахьош ва шахьарера доагор чудувтта моттиг лелаю саг. «Пронефть» яхача ООО оагӀон къахьегамхоша шоай болх баьб, кхоачамбоацараш юкъе долаш. Кхерамзлен хьалаца дувзаденна плакаташ, иштта цу доазон тӀа лораде дезараш белгалдеш дола хьаракаш дацар цига»,- йоах тхога кхаьчача хоамо. Иштта цига теркалдир кхыдола кхоачамбоацараш а. Цу моттига доал дераша цӀерцарча кхерамзлен хьалаца дувзаденнараш шаьрдеш бола болх Ӏомабаьбац, цӀи яьлча эшаш дола улгаш, царца хила деза гӀирсаш доацаш да, цӀи йоаеш тохача хlамай а ха чакхъяьннаяр. Уж деррига гӀалаташ теркаме лаьца, шахьарерча прокурора ши гӀулакх хьадийллар юридически оагӀорахьара цу моттига доал дечунна духьала. 330 эзар сом гӀод техар цунна.
