Заьзгакъонгий-Юрта газ ийккха халача хьале эттарашта, гӀо дир мехкарча паччахьалкхено
01.08.2024 14:13
Заьзгакъонгий-Юрта газ эккхарах геттара халача хьале эттача наха, новкъостал де оарцагӀбаьлар мехка кулгалхой. ДӀабахача бетта 19-ча дийнахьа хилар из хатар. ЦӀеро воагаваь ши саг, вай мехкарча дарбанчера доагама дарба деш йолча селий мехкарча моттиге, Ӏовигийтар мехкадас Келаматанаькъан Махьмуд-Ӏаьлас.
«Хьалхара вице-премьер волча Йовлой Мухьмада кхетаче йир, боагабаьрий цӀагӀарбарашца. Мехка кулгалхочунгара ахча дӀаденна, эшаш мел долча хӀаманца Ӏаьдало гӀо дергда, аьнна, къамаьл дир цо», - дийцар «Сердало» газетага МагӀалбика кхален администраце.
Мехка кулгалхоша тӀахьожам лоаттабеш, лакха терко еш да цу наьха гӀулакх. Боагабаь бадараш, ма хулла сихагӀа дикагӀа хинна, цӀенах кхетийта хьожаш ба мехкахой.
