2026-ча шера шахьаре дӏабахьа безача балхах дийцар Наьсарерча кулгалхоша
23.09.2025 09:24
2026-ча шера, шахьара куц тоадеш, кхоачашде дезарех дийцар Наьсарерча администраце мэра кулгал деш дӏайихьача кхетаче. Шахьара моттигаш меттайоалаярах йолча паччахьалкхен программага гӏолла белгалдаьчарех дийцар гулбеннараша.
«Сердалога» из хоам бир цу моттигера. Тоае езача моттигашта юкъе да Базорканаькъан цӏи лелаеча проспекта № 10 йолча цӏен ков, Московски оалача урама № 31 йола цӏа, иштта хувцамаш хургда Осканаькъан цӏерах болча гон тӏа. Гӏаьзе-Коара Хамхой цӏи лелаю урам тоабе лерхӏ.
«Бахархой хьал аттача доаккхаш хила деза деррига хувцамаш; цудухьа, царца бувзаме бувлаш, царна хетар теркаме эцаш, дӏабахьа беза болх. Цу гӏулакха царга хоаттам беш, дӏакхухьаш хила беза болх», - аьлар шахьара да волча Оздой Руслана.
