Шолжа кхале моттигаш тоаярцара бахархой безам кхебу
06.05.2025 10:29
Шахьара моттигаш тоаяра болча балха бахархой тӀахьех Шолжа кхале. Цигарча администрацешкара кулгалхой болаш, дӀайихьача кхетаче белгалдир цу оагӀонцарча балхаца дувзаденнараш. «Сердало» газетага из хоам бир шахьара администраце.
«Шолжа кхален администраце кулгалхочун гӀонча вола Коазой Адам вар кхетаче дӀахьош. Эггара хьалхарча аргӀанца тоае езача моттигашта къоастам беш дӀахьоча хоржамашта бахархой ма хулла юкъебоалабарах дийцар гулбеннараша», - йоах тхога бенача хоамо. Лакхача боараме из гӀулакх дӀачакхдоаккхаргдолаш, беррига низ тӀабахийта, аьнна, тӀадиллар кхетачен кулгалхочо.
