ГӀалгӀайчен волонтёраш дакъа лоацаш хургба хоржамашка
ГӀалгӀайчен хоржамий кампане дика юкъеозаш латт хоржамаш дӀадахьара лоӀамхой. Иштта лаьрхӀар Наьсаре дӀайихьача видеоконференце доакъашхоша, яхаш, дийцар «Сердало» газетага ГӀалгӀай Республикан кагирхой гӀулакха йолча Комитета зарбан болх лелабеча ГӀулой Аминас.
«Дувца оттадаь дош дар активисташ дӀачӀоагӀбар, Дика.РФ яхача порталага гӀолла «Хоржамий волонтёраш» яха корпус вӀашагӀйоллар. Гулбеннараша дийцар хурболча волонтерашта дешара программа кечъярах. Кагирхой таро хургья хоржамий даькъ тӀара бокъонаш Ӏомае , нийса бувзам лелабе, хоржамий даькъ тӀа теорен дешар юкъедаккха», - йоах хоамо.
Юкъарлон болхлоша яхачох, хӀанз чӀоагӀа лоархӀаме да кхувш йоагӀача тӀехьен сакхетам совбаккхар.
Болх вӀашагӀболларашца цхьана дӀахьош долча Ӏомабаларо уж дукхагӀа бехктокхаме бергба, демократе наькъацара тешам а чӀоагӀлургба.
