ИнгГУ лоӀамхоша новкъостал дара болам дӀахьу, СВО доакъашхой дезалашта лаьрхӀа
Дикача гӀулакхий Ди ГӀалгӀай паччахьалкхен университета студенташа, лоӀамхой болама доакъашхоша дӀадихьар, массаза санна гонахьарча наха накъабоалаш, терко еш, новкъостал деш. Цар бӀарчча дийнахьа дӀа-юха кхухьар СВО доакъашхой дезалашта Ӏажаш.
«ИнгГУ лоӀамахоша шоай дикача гӀулакхашца гонахьарчарна дика масал гойт. Дикача гӀулакхий болам шин дийнахьа дӀабихьар. КӀезига дац цар цу даькъ тӀа деш дола гӀулакхаш. Цар массайолча хана дакъа лоац цу тайпарча боламашка, уж каст-каста болхаш ба могашал яйна бераш долча, дарбанчешка, ара дисача хьайбашка хьажа. Лоацца аьлча, шоашкара новкъостал мел эшача ба уж», - аьлар «Сердало» газетага ИнгГУ зарбан болх лелабераша.
Терко еш хиларо хозду юкъара вахар, нийсхо а дикал а хоалуш хул цу юкъе. Дикача гӀулакхаша Ӏомаву дог лазаш, сатохаш, сабаре хила, терко лоаттаеш, наьха хьашташ довзаш хила, цо ду вай воайла безамегӀа, накъадахара кийча долаш, барт болаш.
