КӀалвисачунна эггара хьалхара гӀо мишта де деза гойтар лораша
ГӀалгӀай паччахьалкхен университета лорий факультете дешаш болча студенташа, эггара хьалхара гӀо мишта де деза гойташ, болх дӀабихьар хьалхара новкъостал деш долча Дийнахьа. Гулбеннарашта хайра дог сецача, цӀий хьийддача, воагаваьча, иштта кхыдола хатараш хиннача сага фу де деза.
«Де дезар хьалхадоаккхаш, тӀаккха балхаца гулбеннараш юкъелоацаш, из дӀахьокхаш къахьийгар гӀо деш лелача лораша. МоллагӀа хатар ийккхача, лозаваьчунна фу де деза, мишта хьовза веза хайра цу кхетачен доакъашхошта», - дийцар «Сердало» газетага университета зарбан болх лелабераша.
КӀалвисача сага гӀо де дезача отта йиш я моллагӀа саг, цудухьа чӀоагӀа лоархӀаме да эггара хьалхара новкъостал мишта де деза ховш хилар. Хьалхара гӀо нийса дича, дуккхача хӀамах кӀалхарваккха йиш я унахо.
