КхозлагIа къоал даьча къуна суд йир вай мехка
Хьалха суд текха волча, кхаь тика чура хIамаш лочкъаяьча къуна 3,5 шу суд йир МагIалбике. Из хоам «Сердалога» бир Iаьдала болхлоша.
«Хьалха суд яь волча, къоал ду гIулакх дика шаьрдаь, куташ еш лелача МагIалбикерча вахархочун гIулакх тохкаш хилар Iаьдал. Укх шерарча тушола бетта, Базорканаькъан цIерах болча МагIалбикерча урам тIа йоаллача тика чу, монтировкаца ниI йохаяь, чуваьнна 7000 эзар сом ахча дихьад цо», - йоах хоамо.
Цхьа къоал даьча саца лаьрхIа воацача цу ираз дайнача баьречо цу бус цхьаькха тика чура 5 мобильни телефон йихьай, тикан даьна 37000 сом зе деш. ДIахо, Гарданаькъан цIи лелаеча урамерча «Вершина» яхача тикан ниI йохаяь, касса яьшка чура, «Садакъа МагIалбик» яхача кIопилга чура кхы а 36 000 сом лочкъадаьд эхь, юхь дайнача зуламхочо.
ШоллагIча дийнахьа хьалехав къу. 3 шуи ялх бутти ха йоаккхаргья цо набахта.
