Дешара шера, Ӏа тӀакхачале, керда бархӀ ишкол хьаелларгья вай мехка
БархӀ керда ишкол хьаелларгья вай мехка шоллагӀча четверте. 5000 совгӀа дешархой тӀаэцаш, шоай наӀараш хьаелларгья таханарча хано дӀадеххача тайпара тоаяьча беркатеча дешара моттигаша.
«Болх бе йолалургйола керда ишколаш: Инаркъера № 6 , № 11 йола ишколаш (720, 540 моттиг), Сурхо тӀара № 4, № 5 йола ишколаш ( 720,704 моттиг), Ӏаьлий-Юртара № 2 йола ишкол ( 704 моттиг), Эбарга-Юртара № 6 йола ишкол (540 моттиг), Шолжа-Шахьарера №10 йола ишкол (720 моттиг), ГӀажарий-Юртара № 5 йола ишкол ( 420 моттиг). Еррига ишколаш РФ дешарах йолча Министерствон лицензеш йолаш я.
Болхлой мугӀ оттабеш, царна доагӀа алапи къоастадеш болх дӀахьош ба карарча хана», - яздир ший телеграм-оагӀон тӀа вай Мехкадас Келаматанаькъан Махьмуд-Ӏаьлас. Таханарча хано дӀадеххача тайпара тоаяь, берашта мел эшар теркалдаь я керда ишколаш.
Йоккхий кхетаченаш дӀакхахьа аьттув луш йола актови, спортивни залаш я ишколашка. Белгалде деза, из болх «Дешар» яхача къаман проектага гӀолла дӀахьош болга.
