Шолжа кхален ДШИ берашта дайзар лётчика Осканаькъан Сулумбика денал
Шолжа кхален Искусствай берий ишколе дӀайихьар «Сигаленга вуга никъ» яха дагалоаттама кхетаче, из хетаяь яр, Россе Турпалхочун Осканаькъан Сулумбик венна 34 шу дузара. Из болх вӀашагӀбеллараша шоашта хьалхашка декхар оттадир дика тӀехье хьалкхее, Турпалхочун карагӀдаьннар диц ца деш, шоай мехкахочун денала сий деш хургболаш.
«Кхетаче къамаьл деш хилар хьехархо Элданаькъан Тамара, цо берашта бовзийтар Осканаькъан Сулумбика вахара никъ: цун къонал, професси, денал, турпала гӀулакхаш. Цо дийцар лётчика вахарах, хоадам болаш белгалдир 1992 шера саькура бетта 7-ча дийнахьа цун валар», - аьлар «Сердало» газетага искусствай ишколе.
Программан исбахьален дакъа хьадийллар ашарашца. Дешархочо, Султиганаькъан Хадижас дӏааьлар, Таривердиев Микаэла, Дербенев Леонида «Хьо воацаш дуне даьсса да» яха илли. Зале мел хиннар уйлангахьа вигар цо, цар шоай дагахьа кхетадора мел доккха во дар цу дийнахьа хезар, вай мехка бахача наха меттел, ерригача Россена а.
Укхаза иштта иллеш даьхар кхыболча дешархоша, царех яр Бохтаранаькъан Хадижа. Цо дӀааьлар ГӏалгӀайчен халкъа артиста, эстрада иллей хьехархочун Хулаганаькъан Артура илли. Кхетаче чакхйоалаш, Искусствай берий ишкола кулгалхочо Боканаькъан Паьтӏамата турпалхой дагалоаттама сий деш берашка кхайкарал дир: «Осканаькъан Сулумбика денал, цун турпалал даим диц ца деш дахалда шун дегашка. Биц ма белаш вай Даьхен турпалаш, уж санна хила хьажа вай мехка накъадоалаш».
«Сигаленга вуга никъ» яха кхетаче дика накъаяьлар берашта, цар кӀоаргга уйла йир цу денал долча, Даьхе бахьан долаш веннача вай турпалхочун наькъа, цун къонахчала.
