«Блокадан маькх» яха болам хьаллаьцар Наьсарерча РДК говзал ӏомаераша
«Блокадан маькх» яха Ерригача Россе болам хьаллоацаш хилар Наьсарерча культуран Цӏагӏа. «Сийг» яхача берий театро, Эккажанаькъан Мадинас кулгал деш, «Вахара чӏегилг» яха литературни-ашарий композици гойтар цига. Сийлахь-боккхача Даьймехка тӏема шерашка Ленинградерча наха гойтача турпалала хетабаь болх бар из.
«Дӏадахача шерашцара бирса, ла ма могга хала дола истори берашта довзийташ моттиг хилар цох. Йоккха, унзара хало тӏакхаьчача ца бохаш духьаллаьттача наьха вахара деношка хиннар хьокхаш бар зӏамига артисташ.
Къаьстта йоккха терко тӏаяхийтар 125 грамм дийнахьа мара ца хиннача, бе хошшал мара йоацача маькха чӏегилга, хӏара дезала лоархӏаме хиннача маькха карточкашта», - дийцар «Сердалога» цу моттигера. Цу шийлача, мецача деношка боккхийбарашта новкъостал деш заводашка къахьегаш, лозабаьрашка хьожаш хиннад бераш а.
Тахан чӏоагӏа тамашийна хет из деррига, бӏехача фашиста леладаьр вӏалла дицдала йиш йоацарех долга кхетаду бераша. Из деррига истори ма дарра гойта гӏерташ берашта 125 грамм маькх дӏайийкъар. Зӏамига маькха чӏегилг теӏаеш латташ, берашта духьалъэттар цу ханарча нахага хинна хьал.
