ГӀалгӀай мехка хьалхара дӀахьош я халкъашта юкъера КъорӀа дешара яхь
ГӀалгӀай Республике хьалхара дӀахьош я халкъашта юкъера КъорӀа дешара яхь, из хетаяьй Деза КъорӀа дикагӀа деша ховрашта, яхаш, дийцар «Сердало» газетага республикан министрий кабинете.
«Маьтсела бетта 25-ча дийнахьа, Наьсаре цун тӀеххьара ди да. Из кхетаче хетаяьй ГӀалгӀайчен хьалхарча муфтена Йовлой Шахьбота Сулумбика, цига гуллургба дикагӀа бола хафизаш. Конкурса къонача доакъашхоша, 27 шу даланза болча хафизаша, Тажвида бокъонех шоашта деша хара говзал гойтаргья. Дакъа лацара дола дехараш хьачу- ийду 2024 шера маьтсела бетта 15-ча денга кхаччалца», - йоах хоамо.
Цу цӀайна хьаьший хургба дин дийша нах, шейхаш. Цу моча кхетачено таро лу вай кагирхошта цу дикача гӀулакха дукхагӀа терко тӀаяхийта, деза КъорӀа Ӏомадара уж тӀакхувш хилийта, цул совгӀа, КъорӀа дика дешаш бараш хьаллацар а да из.
Маьтсела бетта 26-ча дийнахьа, Йовлой Берда цӀерагӀча спорта цӀагӀа нашидашка ладувгӀаш, совгӀаташ луш хургда.
Иштта дӀахьоча кхетаченашка, Даьлах тешар чӀоагӀлу. Нах а шоайла ӀимерзагӀа, безамегӀа берз, шоай дегашка дикал йоссийтара тӀакхувш хул.
