Менингококкови инфекцех дувцача дешара кхетачен юкъе, дакъа лаьцар вай лораша
Менингококкови инфекцех дувцача ерригача Россе онлайн дешара кхетачен юкъе, дакъа лоацаш бар вай мехкара лораш. Из дIахьош хиннараш бар Москверча унахцIенон Департамента № 1 йолча инфекционни клинически дарбанчера лораш.
Из хоам «Сердалога» бир вай мехкарча унахцIенон гIулакхех йолча министерствон болхлоша. Семинаре дийцар, менингококкови инфекцена духьала дIабахьа безача балхах, иштта кхыдолча цунца дувзаденнарех.
Вай лорашта боккха пайда беш хургья из кхетаче, цу оагIонцара шоай кхетам лакхбе аьттув ба цар.
«Менингококкови инфекци яхар Neisseria meningitidis бактереша хьатIадоаккхаш инфекционни лазар да. Назофарингит, менингит, менингококцемин яха лазараш да цох хьахулараш. Из чIоагIа сиха кIоарглуш, духхьал цхьан дийнахьа саг кIалвуташ лазар да. Геттара лорадала дезарех да дегIа могашал дика йоаца бераш, кагирхой, дегIацара низ чIоагIа боацараш.
Дукха нах гулбеннача моттигашка дIа-хьа дала йиш я из лазар. Из хIетта хьакхийттача хана гучадаккхар, цамогаш хиннар къаьсттача моттиге Iовужавар, лазарашта духьала маьхий деттар, бахархошта юкъе цу оагIонца лораде дезарех дувцаш бола болх дIабахьар чIоагIа лоархIаме да», - дийцар «Сердалога» унахцIенон министерстве.
