Мехкарча лораша-травмотологаша йоккхача говзалца дарба дир унахочун кулга
Шолжа кхален керттерча дарбанче Ӏочувоалавир, аьтта кулга чӀоагӀа чов хинна 34 шу даьнна маӀа саг. Кулг, пӀелгаш дохадеш, цӀока кӀалхара мазаш тедаш чӀоагӀа хала чов яр хиннар.
«Лор волча Оздой Йоакъапа, сиха цӀий соцадаь, эггара хьалха де дезаш дола гӀо дир цу сага. Цул тӀехьагӀа эттӀаве Ӏочувигар унахо. ЭттӀавеш хиннараш бар травматологически моттига кулгал деш вола Сампенаькъан Илез, лор-ординатор МарзагӀанаькъан Мухьмад.
ЭттӀавеча хана гучаяьлар кхы а кӀоаргагӀа човнаш - юкъера, пхьарс хотталучара маза (нерв) човхабаьбар. ЧӀоагӀа лакха говзал гойташ болх дӀабихьар цига нейрохирург волча Дзовранаькъан Накира», - дийцар «Сердалога» унахцӀенон Министерстве.
Даьла къахетамца, Цун низаца унахочун кулг меттаоттаде вӀаштӀехьадаьлар лорий. Карарча хана унахо верзаш латт; кулг, пӀелгаш хьоаде могаш ва из.
Хинна чов йоккха хиларга хьежжа, меттавар хало хургдолга белгалду лораша. Кулг дикка тоаденна болх бе доладаллалца, тӀахьожам беш хургба лораш.
