Дерригача дунен бера ди белгалдир Гӏалгӏайчен зӏамагӏбарий театре
Гӏалгӏай мехка лаьрххӏа белгалдир Дерригача дунен бера ди. Из кхетаче хилар берий театре, цига гулбелар зӏамигабараш, цар даьй-ноаной, иштта мехка юкъарча, культуран цхьанкхетарий викалаш. Цӏайна хетаяь программа кийчъяьяр Гӏалгӏайчен берий бокъонех йолча викала Чахкенаькъан Заремас, из хьайийллар «Чиполлино» яха спектакль гойтарца.
Цига шоай массазара болх дӏахьош хилар ТЮЗа болхлой, лакха балха говзал гойташ. Цӏай дӏадолалуш хьалха къамаьл дир, хьаьшашка моаршал хоатташ, Россе театра болхлой Союза Гӏалгӏай отделене кулгалхочо Ховтанаькъан Дугурхана. Цо, ше къамаьл деш, белгалдир берашта терко лоаттаяр лоархӏаме хӏама хилар, уж дикача таронашца дегӏадоагӏаш хила дезилга.
Цу кхетачен керттера дакъа дар РФ СТД гӏалгӏай отделенена, иштта Гӏалгӏай Республикан берий бокъонех йолча викала аппарата юкъе бувзам лелабара бартчӏоагӏам беш хилар. Цу каьхато хьагойт дӏахойодача хана дешара, культуран проекташ цхьана дӏахьош хиларо, берий бокъонаш лораяра болх дикагӏа хулийтаргболга», - аьлар «Сердало» газетага цига хиннараша.
Кхетачено хьагойтар цига хиннараш раьза болга, дукха сийрда моттигаш цар дегашка йиса хилар, къаьстта «Чиполлино» спектаклах берашта боккха салоӏам хинна хилар. Иштта цхьана дӏахьош болча балхах боккха пайда боалаш хилар гуш дар цига, Гӏалгӏайчен къона бахархой кхоллама таронаш дегӏайоалаяра из чӏоагӏа эшаш а ба.
