ЦӀихеза суртанча хиннача Оздой Дауда тахан 65 шу даргдар
Тахан 65 шу даргдар цӀихезача гӀалгӀай суртанчан Оздой Дауда. Халача лазаро хьалха хоададир начӀал долаш хиннача цун вахар, бакъда ГӀалгӀайчен культуре, искусстве сийрда лар йита вахар из. ГӀалгӀай къаман исбахьален искусство дегӀаяра цо юкъедена дакъа дагадоагӀа Республикан Паччахьалкхен архивни гӀулакх леладерашта.
«Оздой Дауд вар дика начӀал дола говзанча, сурташ дахкара даькъ тӀа. Цо йоккхача говзалца леладора тайп-тайпарча техникаца, нах цецбоахаш дола сурташ дахара балхаш. ГӀалгӀайчен культуран тӀехьален цхьа дакъа хинна дӀаэттар цун кхоллам. Дукхача цун балхаша хьагойт гӀалгӀай культура, Ӏалама хозал, вай Ӏадаташ. 1998 шера Оздой Дауда ГӀалгӀай Республикан халкъа суртанча яха цӀи елар», - аьлар «Сердало» газетага ГӀалгӀайчен архивни оагӀув лелабераша.
Оздой Дауда кхоллам дукхача гойтамашка хиннаб, иштта из дика бовзаш болча суртанчаша тӀаийца а бар. Бакъда суртанчан таро хиланзар шийна хетар кхоачашде. Из дӀавахар укх дунен тӀара 2014-ча шера, бекарга бетта 14-ча дийнахьа, цун валар Ӏаткъаш хилар из вовзаш мел хиннарашта а иштта искусствонна а.
