Декхараш кхоачашдаро ГӀалгӀайчен АПК дика дегӀайоалаергья
ГӀалгӀай Республикан ах паччахьа республикан Парламента хьалхашка даьча къамаьлах дувцаш, мехка юртбоахама Министерствон кулгалхочо Гаьгенаькъан Мухьмада белгалдир, 2023 шера юртбоахама болх дика вӀашагӀбелла хилар а, иштта АПК дегӀаяра дика толамаш даьха хилар а, яхаш, дийцар «Сердало» газетага цу боахаме.
«Юртбоахам дукхагӀча даькъе Ӏалама хаоттамах тийша ба. Цунга хьежжа доацаш, 2023 шера цу даькъ тӀа дика пайда баьб ала йиш я. Росстата беча хоамах, республикан юртбоахама продукци; 2023 шера наджгоанцхой, оагӀой бетташка; дерригача боахамашка хилар - 20,5 млрд сомага кхоачаш, е 101,2 %, дӀадахача шера цу хана хинначунца нийсдича. Дерригача юртбоахамашка гулдаь ялат хилар 254,5 эзар тонн», - аьлар министра.
Цо белгалдир, къаьстта республикан кулгалхоша цу деша даим терко лоаттаеш хилар, дукха къаман проекташ а кхетаченаш дӀакхихьа хилар.
«2024 шера, ГӀалгӀайчен юртбоахама Министерствон хьалхашка доккхий декхараш латт, уж кхоачаш ца дича даргдолаш а дац: АПК дегӀаяра йолча паччахьалкхен программо белгалдеш мел дола декхар кхоачашде дезарех да», - аьлар ГӀалгӀай Республикан юртбоахама Министерствон кулгалхочо.
Гаьгенаькъан Мухьмада иштта белгалдир, ГӀалгӀайчен АПК таронаш чӀоагӀлургья; уж декхараш кхоачашдарца, аьнна. Хьамсара мохк а еррига Росси а кхачан кхоачамца Ӏалашъяь хилийтара доккхагӀа дола паччахьалкхен декхар да из.
